المصرى هيفضل مصرى؟؟؟

المصري هيفضل مصري خيرة مسروق ومش عاوز يفوق



من أيام الفرعنة وإحنا بنتسرق.. وبرضة مش عاوزين نفوق.. فاتت علينا كام دولة وسرقت خيرنا مش عارف.. أشي أتراك ورومانيين وعثمانيين وفرنساويين وإنجليز وإيطاليين وإسرائيل كام سنة علي الماشي.. دا غير حكمانا طبعا ووزرائنا اللي بيسرقونا عيني عينك وبرضة مش عايزين نفوق.

عملين لينا البحر طحينه.. ومافيش فلوس.. والحياة وحشة وكل 30 ثانية بيتولد عيل في مصر وهنجيب للناس دي شغل منين مع أن في الصين مثلا كل فيمتو ثانية بيتولد عيل وعددهم يجي ثلث الكرة الأرضية كلها وعايشين ميت فل و14

من كام يوم كنت قاعد أنا وشوية مقاطيع من صحابي علي القهوة وقاعدين بنم في خلق الله.. وجت سيرة الكلام ده.. واحد منهم ليه قريبته عايشه في أمريكا بسألة عادي هما عاملين أية قالي دول يعيني لسه بيكونوا نفسهم ده اقل بيت هناك يعمل بتاع 100 ألف دولار.

طبعا في واحد صحبي سورق من الرقم بعد مطلع الإلة الحاسبة وضرب 100 في 6 ولقاهم 600.000 ألف جنية مصري يعني يجوزوا يجي 16 شاب وفتاة في مصر..

رحت عامل فيها أبو العريف وشارح ليهم النظرية اللولبية للحياة الأمريكية..

قلتلهم يا جماعة عادي جدا ده فرق عملة بس تعالوا هنا في مصر وشوفوا اقل شقة تسولها كام يجي 100 ألف جنية في مصر وعشان هما في أمريكا اقل شقة برضة تسولها 100 ألف بس دولار عشان دول في أمريكا.

تعالوا مثلا لفئة زينا إحنا الكتاب أقل كاتب عندنا بيقبض له يجي 300 جنية شهريا ده لو شغال موس في الصحافة.. ولما ربنا يفتح عليه زينا كده يعدي الألف وزيادة.. ولو مؤلف مثلا هنا يعملة كام ألف ملطوش في الكتاب الواحد..

هضرب لكم مثل د/ نبيل فاروق مثلا .. لو كان هو في أمريكا مثلا مش كان زمانه شاري جزيرة في الكاريبي بيكتب فيها بدل المكتب اللي في شارع الأسحاقي.. يعني هي جي كي رولنج مؤلفة هاري بوتر اللي جمعت في سنتين مليار دولار ولا" كليف كلسر" أشهر كاتب جاسوسية في أمريكا يعني هما أحسن منة في أية لولا حظة النحس اللي خلاه يعيش في مصر.

أنا مثلا مش كنت ممكن أخد من صاحب دار النشر اللي نشر لي كتاب قاموس روش طحن كام مليون بدل ما كنت أخد منة 100 جنية أه والله 100 جنية وقالي أنت لسه كاتب مبتدأ لما تنشر كتب كتير هزودك يجي 300 جنية راجل جامد موت..

بلاش أنا عشان ما تقلوش أني متحيز لنفسي دكتور أحمد خالد توفيق كان زمانه مشاء الله أشتري قرية ملعونة يقعد يكتب فيها برحتة قصص رعب ويخوف الناس هناك وبقي أحسن من ستيفن كينج.. ولا لافكرافت.. ولا كليف باركر.. ولا ريتشارد ماثيسون

.. محمد سليمان عبد المالك مثلا مش كان زمانة في أمريكا خبير مصريات بسلسلة لوتس اللي بيعملها دي ونسخة بتتباع بالملايين



و تامر إبراهيم كان زمانه أشترا له بيت رعب ولا قصر الكونت دراكولا نفسه وبقي زى ستيفن كينج اللي بيعشقة ولا أدجار آلان بو.

وخالد الصفتي كمان بقي ديزني يعني هو ديزني أحسن منة يعني ديزني عمل حتة فار طلعة السما شوف بقي خالد الصفتي عندة يجي 55 شخصيه يعني كان زمانه في أمريكا عنده ملاهي محترمة .

والمناضل الكاريكاتيري شريف عرفة مش كان زمانه بقي ولا ناجي العلا دلوقتي ميت ولا زى الرسام الأمريكي المشهور جان مايكل باسكيات ( مين باسكيات ده ).

في الحقيقة إحنا بلد فقرية واللي عيشين فيها رضين بالهم والهم مش راضي بيهم





منقووووووووووول